Kva gjer vi på
Øen Grendalag held til i grendahuset Vonheim på Sørbøvåg som vart reist i 1933. Vonheim har i alle år vore veldig viktig for bygdefolket fordi det har vore ein naturleg møteplass og eit lokale å leige til store tilstelningar.
Grendalaget har i over 60 år vist spelefilmar i Vonheim. Dei siste 50 har Bygdekinoen hatt Vonheim på turnelista si med kino annakvar veke. Bygdekinoen har filmar for alle aldersgrupper og Øen Grendalag oppfordrar alle til å støtte denne slik at vi får behalde den i bygda! Dei har også hatt utekino i Kvernsteinsparken, noko som vart svært kjekt.
I tillegg til kinodrift, arrangerer dei mellom anna jonsokfeiring, quiz, julebord og basar. Vonheim kan leigast til møter, kurs, selskap eller andre tilstelningar. I tillegg kan ein leige bord og stolar til eigne arrangement. Ynskjer du å leige, finn du kontaktinfo til husansvarleg lenger nede i artikkelen.
I hamneparken på Sørbøvåg finn du kommunen sin einaste godkjende badeplass, fotballbane, sandvolleyball, pingpong, mini-klatrepark, toalett og grillhytte. Øen grendalag driftar og disponerar dette området, og dei ynskjer å vere eit aktivt lag som skaper engasjement og gjer til at både Vonheim og Hamneparken vert gode samlingsplassar.
I Vonheim har dei planar om oppgradering av kjøkken og å etablere internett-tilgang. Dei ynskjer og å utvikle badeområdet og leikeområdet, samt å ferdigstille grillhytta i Hamneparken. Her kjem det til å verte oppfordra til dugnad som dei håpar mange vil stille på!
Kven kan vere med
Dei siste åra har det flytta nokre småbornsfamiliar til bygda og det vert bygd nye hus. I tillegg er det mykje næringsaktivitet i bygda så laget ser ei positiv utvikling. Dei ynskjer å styrke samhaldet i Sørbøvåg, og å vere inkluderande gjennom arrangement og sosiale aktivitetar for alle. Dei ynskjer og fleire medlemmar, så meld deg gjerne inn!
Om du ynskjer å melde deg inn, ta kontakt med leiar Karin Tonning Hatløy eller kasserar Camilla Avedal Ulvik. Ynskjer du å leige Vonheim, kontakt husansvarleg Irene Lien.
Kontaktperson
Karin Tonning Hatløy
Telefon: 909 85 389
E-post: karintonninghatloy@hotmail.no
Besøk gjerne Øen Grendalag si facebookside
Øen Grendalag har og eiga heimeside, den finn du her